Дүниежүзі қазақтары қауымдастығы

Басты бет | Жаңалықтар | «ҰБТ-2016» 125 ұпай алған 19 түлектің алтауы «Дарын» білім беру желісіне қарасты мектепті бітіргендер

15.06.2016

«ҰБТ-2016» 125 ұпай алған 19 түлектің алтауы «Дарын» білім беру желісіне қарасты мектепті бітіргендер

      «Дарын» республикалық ғылыми-практикалық орталығының хабарлауынша, Ұлттық біріңғай тестілеуде (ҰБТ) ең жоғарғы 125 ұпай алған 19 түлектің алтауы «Дарын» білім беру желісі мектептерін бітіргендер.

     «Дарын» республикалық ғылыми-практикалық орталығы желісінде қазір еліміз бойынша  124 мамандандырылған, яғни дарынды балаларға арналған облыстық және республикалық деңгейдегі мектеп-интернаттар мен лицейлер және гимназиялар бар. Олар жаратылыстану-математикалық, қоғамдық-гуманитарлық, музыкалық, әскери-спорттық бағыттарды қамтиды. 

         Жыл сайын  ҰБТ қорытындысы бойынша мамандандырылған білім беру ұйымдарының 61%-ы республикамыздың үздік 100 мектебі қатарына кіреді. Мысалы дарынды балаларға арналған мектептерден (124) ҰБТ-ға 4 407 мектеп бітіруші қатысса, тестілеу қорытындысы бойынша орташа балл – 98 балды құрады. «Алтын белгіге» үміткер 706 түлектің 484-і «Алтын белгіні» дәлелдеп шықты.

       Осылайша, оқушылардың жыл сайынғы жоғары жетістіктері дарынды балаларға арналған мектептердің өз мәртебесіне сай екендігін іс жүзінде дәлелдеуде. Айта кету керек, биыл 24 мамырда «Дарынды балалар мен дарынды балаларға арналған мектептерді қолдау туралы» Президент жарлығының шыққанына 20 жыл толды (24 мамыр 1996 жыл № 3002).

       Осы уақыт аралығында  ҚР БҒМ «Дарын» республикалық ғылыми-практикалық орталығы елімізде бірнеше Халықаралық олимпиада ұйымдастырды. Олардың ішінде 2015 жылы   86 елдің 630 оқушысы қатысқан IOI-2015 (оқушылар арасындағы информатикадан XXVII халықаралық олимпиада), 2014 жылы 85 елдің қатысуымен өткен 45-ші Халықаралық физика олимпиадасын, 2012 жылғы химиядан халықаралық Менделеев олимпиадасын және 2010 жылы 98 елдің қатысуымен өткен халықаралық математика олимпиадасын айтуға болады.

      Дарын білім беру желісі мектептерінің биыл ҰБТ-дан 125 балл алған 6 түлегінің тізімі

ТУРДИЕВА МЕРЕЙ ХАЙРОЛЛАҚЫЗЫ

    Оңтүстік Қазақстан облысы,  Шымкент қаласы №2 мамандандырылған үш тілде оқытатын мектеп-интернаты. «Алтын Белгі» иегері

     «2009-2010 оқу жылында 5-сыныпты, 2010-2011 оқу жылында 6-сыныпты «Үздік мақтау грамотасымен» аяқтадым . 2011-2012 оқу жылында №2 дарынды балаларға арналған мамандандырылған мектеп-интернатына ауысып, 7-сыныпты, 8-сыныпты «Үздік мақтау грамотасымен» аяқтадым.  Осы оқу жылдары барысында, математика, биология, қазақ тілі пәндерінен мектепішілік пән олимпиадаларына қатысып, жүлделі орындарға ие болып, жоғары нәтижелер көрсеттім. «Дарын» республикалық ғылыми-практикалық орталығының ұйымдастыруымен өткен зияткерлік сайыстарға, олимпиадаларға қатысып жеңімпаз атанғаным менің қызығушылығымды туындатып, алға ұмтылдырып ізденіске жетеледі. Білім Ордасының жүйелі түрде жолға қойылған білім жоспарлары, ұлағатты ұстаздарымның  білім беру жолындағы тынымсыз еңбектері мен ата-ана, отбасымның берген тәрбиесі және талмай еткен еңбегімнің арқасында ұлттық бірыңғай тесттен 125 балл жинадым. Осындай жетістікке жетуіме қолғабыс жасаған мектебіме, ата-анама алғысым шексіз! Еліміздің тәуелсізідігінің 25 жылдығымен баршаңызды құттықтағым келеді.

       

МЕИРХАНОВА АРУЖАН ЕРЛАНҚЫЗЫ

   Алматы қаласы, Ы. Алтынсарин атындағы № 159 мектеп-гимназиясы, «Алтын Белгі» иегері

       11 сынып табалдырығын аттағаннан кейін-ақ, мен өзіме ең жоғарғы нәтижеге қол жеткізуді мақсат етіп қойдым. Жыл бойы таңертеңнен бастап кешке дейін табанды дайындыққа кірісіп, 5-11 сыныптар арасындағы өтілген мектеп бағдарламасын қайталадым.

     Білімді шәкірт білімді ұстаздан ғана шығады, сондықтан да ұстаздарымыздың ерен еңбегін атап өткім келеді. Олар бізді білім нәрімен сусындатып, тестілеуге психологиялық тұрғыдан да дайындады. Екінші анамыздай болып кеткен сынып жетекшімізге де, бүкіл ұстаздар қауымына да алғысымыз шексіз.

       Сонымен бірге, біздің дайындығымыз үшін бар жағдай жасаған ата-аналарымызға, әрқашан бізге демеу берген сыныптас достарыма да ерекше алғысымды білдіргім келеді. Осындай қолдау мен дайындықтың нәтижесінде мен тестілеуге сенімді болып кірдім. Жоғары ұпай алуымның себебі мен құпиясы да осында.

  

ОСПАНОВА РАМЗИЯ

          Алматы қаласы Ы. Алтынсарин атындағы № 159 мектеп-гимназиясы. «Алтын Белгі» иегері

       Осындай жетістікке жетуім біріншіден, ата-анамның шексіз берік қолдауы, екіншіден, ұстаздарымның оқушылары үшін аянбай сіңірген қажырлы еңбегі мен өзімнің де білімге деген құштарлығымның арқасы деп білемін. «125 балл» деген жоғары нәтижеге қол жеткізгеніме сыныптастарымның да қосқан үлесі зор. Олар маған сенім артып, мені әрқашан қолдап жүрді.

      Балам ең сапалы білім алып, білімді де зерек оқушы болсын деп мені еліміздің ең үздік білім ордаларына оқуға жіберген анама, әкеме, шәкірт деп бар күшін салып білім нәрін сусындатып, адамгершілік қасиеттерді бойыма дарытқан ұстаздарыма, маған демеу бола білген достарыма деген алғысым шексіз!

 

      КЕНСЕБЕКОВ АБЫЛАЙ ЕРКІНҰЛЫ

       Шымкент қаласы . М. Х. Дулати атындағы үш тілде оқытатын мамандандырылған

№8 гимназия. «Алтын Белгі» иегері

         М. Х. Дулати атындағы үш тілде оқытатын мамандандырылған №8 гимназияның 2015-2016 оқу жылының «Алтын белгі» иегерімін. Көп балалы отбасыда тәрбиелендім.  Бұл білім ұясында мен үшінші сыныптан бастап оқыдым, бастауыш сыныптан бастап оқу озатымын.

       Ұстаздарым мен ата-анамың тәрбиесінің арқасында  және талмай еткен еңбегімнің нәтижесі болар ұлттық бірыңғай тестілеуден  125 балл жинадым.  «Дарын» республикалық ғылыми-практикалық орталығының ұйымдастыруымен өткен зияткерлік сайыстарға, олимпиадаларға қатысуым қызығушылығымды туындатып, алға ұмтылдырып ізденіске жетеледі. Футболға міндетті түрде уақыт табамын. Министр бастаған барша білім жүйесіндегі ұстаздарға тәуелсіз қазақстанымның азаматы ретінде алғысымды айтқым келеді.

          

ӘБІШЕВ ТІЛЕКБЕРГЕН АБДЫМАНАПҰЛЫ

       Қарағанды облысы білім басқармасы. «№3 Қазақ түрік лицей-интернаты». «Алтын Белгі» иегері

         Ұлттық бірыңғай тестілеуде 125 балл жинап, жалпы орта білім туралы «Алтын белгі» аттестат иегері атанып отырмын. Лицей  қабырғасындағы түрлі білім сайыстары мен шығармашылық байқауларда жеңімпаз атандым. Атап айтсақ, «Дарын» республикалық ғылыми-практикалық орталығының ұйымдастыруымен өткен зияткерлік сайыстарға, олимпиадаларға қатысу мені бәсекеге қабілетті болуға шыңдады. Мысалы, жалпы білім беретін пәндерден республикалық олимпиаданың облыстық кезеңінде химия пәнінен ІІІ орынды, «KATEV» халықаралық қоғамдық қорының ұйымдастыруымен өткен Республикалық пән олимпиадасында химия пәнінен ІІ орынды, жаратылыстану-математика пәндері бойынша оқушылардың VІІІ Президенттік олимпиадасында ІІІ орынды иелендім.

       Қазір  ағылшын тілінен IELTS емтиханының қорытындысы бойынша  әлемдегі, ТМД-дағы белді университеттердің бірі  Назарбаев университетінің түлегі атанып отырмын.

      Осы жетістіктерге жеткізген мектебіме, ұстаздарыма, дарынды балаларды тәрбиелеуге көңіл бөлген президентіме алғыс айтамын.

       

МАТКАЛЕВА ДИНАРА МАРАТКЫЗЫ

         Алматы қаласы .№12 Шоқан Уәлиханов атындағы дарынды балаларға арналған

мамандандырылған мектеп. «Алтын Белгі» иегері

         2005 жылы  ең алғаш Алматы қаласында №12 қазақ мектебі болып ашылған  92 жылдық тарихы бар «Қазақтың қара шаңырағы» атанған Алтын Ұя мектебімнің  табалдырығын аттадым.

      Менің ҰБТ-да 125 балл алып жоғары көрсеткішке жеткеніме, өзімнің  білім кемесінде ерінбей еңбектеніп, аянбай бар ынта-жігеріммен 11 жыл алған білімімнің нәтижесін жоғары деңгейде көрсетіп, мектеп мақтанышына айналуыма ұстаздарым мен әкем, анам көп үлес қосты.

      Мектеп, әр оқушының қабілетіне қарай, даралай және саралай білім бере алатын, білікті ұстаздар қауымымен ерекшеленеді. Қазір мектебіміз дарынды балаларға арналған мамандандырылған мектептер қатарына кірді.

      Менің мақсатым - Қазақстанның қаржы-экономика саласының ең үздік маманы болу. Сыныптастарыма және барша мектеп бітірушілерге айтарым «Үлкен өмір белестерінде»  биік шыңдардан көріне берулеріңе тілектеспін!         

Пікір қосу

Пікірлер

Бас демеуші

Дүниежүзі қазақтары қауымдастығының ұйымдастыруымен Қазақстанда және шетелдерде өтетін мәдени шаралардың бас демеушісі – «Самұрық-Қазына» ұлттық әл-ауқат қоры» акционерлік қоғамы

Ұсынамыз

ҚР БІЛІМ ЖӘНЕ ҒЫЛЫМ МИНИСТРЛІГІ

ҚР ЕҢБЕК ЖӘНЕ ХАЛЫҚТЫ ӘЛЕУМЕТТІК ҚОРҒАУ МИНИСТРЛІГІ

ҚР ҰЛТТЫҚ ЭКОНОМИКА МИНИСТРЛІГІ

ҚР ІШКІ ІСТЕР МИНИСТРЛІГІ

Құттықтау, құтты болсын

ҚР СЫРТҚЫ ІСТЕР МИНИСТРЛІГІ

Барлық ұсыныстар

Мекен-жайы
050002, Алматы қаласы
Ш.Уәлиханов көшесі, 43 А
Тел/факс: +7 (727) 2739997, 2733244.

Web: www.qazaq-alemi.kz
Модератор: info@qazaq-alemi.kz
Қабылдау бөлімі: qabyldau@qazaq-alemi.kz

ЖОЛ КАРТАСЫ

Сайт материалдарын қолдану үшін сілтеме көрсетуіңіз міндетті