Дүниежүзі қазақтары қауымдастығы

Басты бет | Жаңалықтар | Дүкен Мәсімханұлы: «Дүниежүзі қазақтарының бірлігі күнін» белгілеу керек

21.11.2016

Дүкен Мәсімханұлы: «Дүниежүзі қазақтарының бірлігі күнін» белгілеу керек

            

      Филология ғылымдарының докторы, профессор, Қазақстанның еңбек сіңірген қайраткері, Л.Н.Гумилев атындағы Еуразия ұлттық университеті қытай филологиясы кафедрасының меңгерушісі Дүкен Мәсімханұлы өзінің facebook-тегі жеке парақшасында осындай мәлімдеме жасады, деп хабарлайды Baq.kz.

 

«АРДАҚТЫ АЛАШ БАЛАСЫ!
ҚАДІРЛІ АҒАЙЫН!
ҚҰРМЕТТІ БАУЫРЛАР!
ДҮНИЕЖҮЗІНДЕГІ ӨЗІН "ҚАЗАҚПЫН" ДЕП ЕСЕПТЕЙТІН АЗАМАТ!

     Ұлттың тағдыры мен болашағына, бірлігі мен тірлігіне қатысты менің мына ұсынысыма қолдау көрсетіп, дауыс берулеріңізді сұраймын!
      P.S.: Алдағы уақытта берген дауыстарыңыз саналып, аты-жөндеріңіз жазылып, (ФБ алаңында жоқ басқа да көрнекті қоғам және мемлекет қайраткерлерінің, әйгілі өнер адамдарының, белгілі ақын-жазушылардың, ғалымдардың, спортшылардың қолы жиналып) бұл ҰСЫНЫС Ақордаға, ҚР Парламентіне, ҚР Үкіметіне жөнелтіледі.

ҰСЫНЫС

      Бір кездері тарихи жағдайларға байланысты қазақ халқы дүниежүзінің түкпір-түкпіріне тарыдай шашырап, шілдей тозып кетті. Тәуелсіздік алған күннен бері Н.Ә.Назарбаевтың көші-қон және демографиялық саясатының арқасында алыс-жақын шетелдерден бір миллиондай қандасымыз Отан құшағына оралды. "Қайда болса да жан бақпақ парыз" деген қадіми қағида бар. Сол қағидамен әлі де 5 миллиондай қандасымыз дүниенің түкпір-түкпірінде тірлік етіп жатыр. Елге оралғысы келгені жәйлап келе жатар. Бірақ сол 5 миллион қазақтың түгі қалмай, түп қотарылып көшіп келуі де неғайбыл...

Тәуелсіздікке қол жеткізуден, оны сақтап қалудың әлдеқайда қиын екенін барлықтарыңыз жақсы білесіздер. Ол үшін Мемлекеттің егесі болып отырған Қазақ халқының өзінің ішкі ынтымақ-берекесі, ауызбірлігі, татулығы, бауырмалдығы шешуші рөл атқарады. Жаһандану дейтін мынадай алмағайып заманда Бізге, Алаш баласына тіпті де бір жағадан бас, бір жеңнен қол шығарып, әйгілі ақын Сабыр Адай айтқандай "ӘР ҚАЗАҚ МЕНІҢ ЖАЛҒЫЗЫМ" деп тірлік етуімізге тура келеді. Ол үшін Ұлтымызды ұйыстырып, жұртымызды жұмылдыра түсетін маңызды іс-шаралар керек. Ондай іс-шараның түрі көп. Соның бірі - ҰЛТ БІРЛІГІ КҮНІ!

      Шыны керек, біздің Елде де аз болмаған меркелер бар. Бірақ олардың бәрі мемлекеттік, жалпыадамзаттық, жалпышығыстық, жалпымұсылмандық сипатта болып келеді. Әрине, ол да керек. Дегенмен, бізге ҚАЗАҚ дейтін халықтың өзінің ынтымақ-берекесіне, ауызбірлігіне, татулығы мен бауырмалдығына оң ықпал ететін жеке мереке өте керек. Сондай-ақ, ол мереке бүкіл дүниежүзіндегі қазақ баласының бәріне (көшіп келгені бар, келмегені бар, Отанда өмір сүріп жатқаны бар...) ортақ болу керек!

       Үкімет ұсынып, Елбасы қол қойса, қазірше бейресми мереке ретінде қоғамдық негізде атап өтуге болады. Мәселен, бастапқы кезде, Қазақстанда "Дүниежүзі қазақтары қауымдастығының" орталық аппараты, және оның Астана мен өзге облыстардағы бөлімшелері, Шетелдерде қазақ мәдени орталықтары мұрындық болады. Бірте-бірте жалпыұлттық деңгейге көтеріліп кетеді.

        Бұл әсіресе, Ел егесі болып отырған Қазақстандағы қандастарымыздың береке-бірлігінің нығая түсуіне, сонымен бірге шетелдерде, соның ішінде Еуропа елдеріндегі өте азшылықта өмір сүріп жатқан қандастарымыздың жас ұрпағы үшін, олардың жыл сайын бас қосып, өздерінің қазақ баласы екендігін сезініп, ұлт патриоты болып өсуіне ерекше игі ықпал етеді деп сенеміз.

«Сонымен, біз ұсынып отырған мерекенің атауы - «ДҮНИЕЖҮЗІ ҚАЗАҚТАРЫНЫҢ БІРЛІГІ КҮНІ»

Уақыты - ҚЫРКҮЙЕК АЙЫНЫҢ 30-шы КҮНІ.

Бұл күн:

      - Қазақ елі тәуелсіздігінің екінші жылы, яғни 1992 жылы "Дүниежүзі қазақтарының тұңғыш құрылтайы" өткен күн.
- Дүниежүзі қазақтары қауымдастығы құрылған күн.
- Халқымыздың пейіліндей дарқан, берекелі, шуақты кез (іздене берсек, басқа да тарихи даталармен сәйкес келуі мүмкін).

        P.S.: Ескерте кететін бір жағдай, бұндай мерекеден қорқып, үркудің, одан әлде қандай ұлтшылдық сыңай іздеудің қажеті жоқ! Өйткені әлем халықтарының көбінде бұндай мереке көптен бері тойланып келеді. Біз бәрін емес, іргеміздегі екі алып көршіміз бен бауырлас Әзербайжан елінде дәстүрлі түрлі тойланып келе жатқанын еске салсақ та жеткілікті.

Ал, Ағайын, қолдаңыздар!

Дауыс беріңіздер!

Сіздерге деген зор құрметпен – бауырларыңыз Дүкен Мәсімханұлы

21 қараша 2016 жыл. АСТАНА» деп жазған ғалым.

           https://baq.kz/kk/news/kogam/duken_masimhanuli_duniezhuzi_kazaktarinin_birligi_kunin_belgileu_kerek20161121_142500

Пікір қосу

Пікірлер

Бас демеуші

Дүниежүзі қазақтары қауымдастығының ұйымдастыруымен Қазақстанда және шетелдерде өтетін мәдени шаралардың бас демеушісі – «Самұрық-Қазына» ұлттық әл-ауқат қоры» акционерлік қоғамы

Ұсынамыз

ҚР БІЛІМ ЖӘНЕ ҒЫЛЫМ МИНИСТРЛІГІ

ҚР ЕҢБЕК ЖӘНЕ ХАЛЫҚТЫ ӘЛЕУМЕТТІК ҚОРҒАУ МИНИСТРЛІГІ

ҚР ҰЛТТЫҚ ЭКОНОМИКА МИНИСТРЛІГІ

ҚР ІШКІ ІСТЕР МИНИСТРЛІГІ

Құттықтау, құтты болсын

ҚР СЫРТҚЫ ІСТЕР МИНИСТРЛІГІ

Барлық ұсыныстар

Мекен-жайы
050002, Алматы қаласы
Ш.Уәлиханов көшесі, 43 А
Тел/факс: +7 (727) 2739997, 2733244.

Web: www.qazaq-alemi.kz
Модератор: info@qazaq-alemi.kz
Қабылдау бөлімі: qabyldau@qazaq-alemi.kz

ЖОЛ КАРТАСЫ

Сайт материалдарын қолдану үшін сілтеме көрсетуіңіз міндетті